Манай сургууль нь STEM хөтөлбөрийг бага ангиас нь орж эхлэх бөгөөд Science, Technology, Engineering, and Mathematics буюу шинжлэх ухаан, технологи, инженерчлэл, математик суурьтай бага ангийн боловсролын хөтөлбөрийг дэмжин ажиллаж илүү техник сэтгэлгээтэй идэвхтэй сурагчийг бүтээх юм. Уг хөтөлбөрийн дагуу сурагчид Математик тоо, Байгалийн ухаан, Хүн ба байгаль, Хүн ба орчин гэсэн хичээлийг гүнзгийрүүлэн судалж танин мэднэ.

STEM үндсэн хөтөлбөр

• Шинжлэх ухааны судалгаа хийх;
• Хялбар механизм бүтээж цахилгаан хэлхээн дээр ажиллах;
• Шинийг санаачлагч шинэ технологи бүтээх;
• Дизайн технологи болон мэдээлэл технологийн талаар судалгаа хийж ажиллах;
• Тооцоолон бодож математик сэтгэлгээг хөгжүүлэх;
• Багаар ажиллах чадвараа дээшлүүлэх.

Сургуулийн бага нас нь сурагчдын хувьд сургуулийн өмнөх боловсролоос бага сургуульд шилжиж буй үе байдаг тул хүүхэд нийгэм, сэтгэл зүйн хувьд хөгжиж, төлөвших чухал нас юм. “Хувь хүний хөгжил” хөтөлбөр нь сурагчдын нийгэм, сэтгэл хөдлөл, өөрийгөө танин мэдэх чадварыг хөгжүүлж, сэтгэл хөдлөлийн чадамж (EQ)-тай бие хүн болгон төлөвшүүлэхэд оршино. 

• Бясалгал: Хичээл бүрийн эхэнд нэг минутын бясалгал хийх бөгөөд бясалгал нь сүүлийн үеийн шинжлэх ухааны судалгаагаар танин мэдэхүйн чадварт эергээр нөлөөлж, сэтгэл зүй, сэтгэл санааны байдлыг сайжруулдаг нь тогтоогдсон;
• Сэтгэл хөдлөл, мэдрэмж: Сэтгэл хөдлөл, мэдрэжийг таних, ойлгох, өөрийн сэтгэл хөдлөлийг таньснаар зөвөөр илэрхийлж сургахад чиглэсэн хичээл;
• Бие махбодын эрүүл мэнд: Дасгал хөдөлгөөний сэтгэл зүйд нөлөөлөх эерэг нөлөөний талаарх ойлголт, мэдлэгтэй болох; Хичээлийн дундуур нэг минут дасгал хөдөлгөөн хийнэ;
• Эмпати, сайхан сэтгэл: Бусдын оронд өөрийгөө тавих буюу эмпати чадвартай, сайхан сэтгэлтэй, тусч хүн болгоход чиглэсэн хичээл;
• Өсөн дэвжих сэтгэхүй, зорилго: Өсөн дэвжих сэтгэхүйтэй болох, хувийн амьдрал ба хичээлийнхээ хүрээнд зорилго төлөвлөгөөтэйгөөр аливааг хийж бүтээдэг бие хүн болох талаарх хичээл;
• Сурах арга барил: Сурагчдын сурах арга барилыг тодорхойлж, түүнд тохирсон болон хөгжүүлэхэд чиглэсэн сургалтын арга зүй.

Урлагийн боловсролын хүчээр дамжуулан уран бүтээлчид, шинийг санаачлагч, өөрчлөн шинэчлэгчдийг төлөвшүүлэх, бүтээлч сэтгэлгээг хөгжүүлэх болно.

• Бүтээл хийх: Хайрцаглагдсан байдлаас ангид байх сэтгэлгээн дээр суурилсан төрөл бүрийн материал, загварчлал ашиглан бүтээл тууривах.
• Урлагийн төрлүүдийн талаарх мэдлэг: Хөгжим, сонгодог урлаг, визуал арт гээд урлагийн янз бүрийн төрлүүдийг ойлгох, өөрийн дотоод ертөнцийг урлагаар дамжуулан илэрхийлэх мэдлэг, ур чадварыг олох үйл ажиллагаа.
• Сонгодог урлагийн талаарх мэдлэг: Алдартай зураачдын бүтээлийг ойлгох, дэлхийн хэмжээний урлагийн талаар тодорхой хэмжээний суурь боловсрол олгох.
• Гоо зүйн мэдрэмж: Аль ч салбарт гоо зүйн мэдрэмжтэй хандах, бүтээлч шийдэл, загвар гаргах чадварыг төлөвшүүлэх.
• Төсөл хэрэгжүүлэх: Өөрсдийн онцлог сэтгэлгээ, зан чанар, эсвэл нийгмийг тойрсон
  сэдвүүд, мэдрэмжүүдээр уран сайхны олон төрлийн хэв маягийг ашиглан
  төсөл хэрэгжүүлэх, уран бүтээл тууривах зэрэг сурагчдад өөрсдийгөө
  илэрхийлэх, хөгжүүлэх үйл ажиллагаанууд багтдаг.

Бид биеийн тамирын дасгалаас гадна монгол уламжлалт болон орчин үеийн спортоор дамжуулан хөдөлгөөний идэвхтэй, самбаачлагатай хүүхдүүдийг бэлтгэх хөтөлбөр боловсруулсан.

• Биеийн тамир болон бусад: Уламжлалт биеийн тамирын хөтөлбөрөөс гадна бүжиг, гимнастикаар дамжуулан хүүхдийн уян хатан байдал, эрүүл өсөлт хөгжилтийг дэмжинэ;
• Хананд авиралт: Сургуулийн заалыг ууланд авиралтын спортын тоноглолоор тохижуулсан бөгөөд сурагчдыг хөдөлгөөний эвсэлтэй, бие бялдрын өв тэгш хөгжилтэй болгохоос гадна байгаль орчинтой зөв харьцах зэрэг олон ур чадварыг төлөвшүүлнэ;
• Эрүүл амьдралын хэв маяг: Эрүүл хооллолт болон идэвхтэй дасгал хөдөлгөөний чухал, давуу талыг таниулах, хэвшүүлэх хичээл багтана.

Мэдээллийн технологийн хөтөлбөрөөр аппликейшн дээр тоглоом тоглох арга зүйгээр хичээл орно. Хөгжилтэй тоглоомын аргаар бага насны хүүхдэд тохирсон компьютерийн програм зохиож, асуудал шийдвэрлэх чадварыг дээшлүүлнэ.

Манай сургуулийн ёс зүйн хөтөлбөр нь монгол уламжлалт ёс суртахуун болон орчин үеийн нийгэмд амьдрахад шаардлагатай биеэ зөв авч явах чадварыг суулгах, бусдыг гэсэн нинжин сэтгэл, өөрийгөө болоод бусдыг хүндэлж, анхаарал халамж тавьдаг зөв хандлага зэргийг төлөвшүүлэх зорилготой. 

• Монгол ёс суртахуун: Монголын уламжлалт ёс суртахууны талаар мэдлэгтэй болж мэндлэх, хүндлэх ёсон, бусад хүмүүс болоод ан амьтан, байгаль дэлхийг хайрлаж энэрэх ухаанд суралцана;
• Харилцаа хандлага: Ёс зүйн хичээлээр бусдад хэрхэн эелдэг, хүндэтгэлтэй хандах, бусдын оронд өөрийгөө тавьж үзэх буюу эмпати чадвар зэрэг чадварыг эзэмшүүлнэ;
• Биеэ авч явах соёл: Өдөр тутмын нийгмийн амьдрал, олон нийтийн газруудад биеэ зөв авч явах соёлд сургана;
• Олон нийт/сайн дурын ажил: Сурагчид бага ангиасаа эхлэн олон нийтэд чиглэсэн болон сайн дурын ажилд оролцож, нийгмийн үйл ажиллагаанд хувь нэмрээ идэвхтэй оруулдаг иргэнийг бүтээнэ.

Манай сургуулийн “Бизнес, эдийн засаг”-ийн хөтөлбөр нь сурагчдыг багаас нь санхүү, бизнесийн ойлголттой болгоод зогсохгүй хувь хүний санхүүгийн төлөвлөлт, мөнгөн хөрөнгийн удирдлагыг математикийн хичээлтэй холбон тайлбарлаж бодит төсөөлөл олгох юм.

• Мөнгөний үнэ цэн, ач холбогдол: Интерактив тоглоом, үйл ажиллагаагаар дамжуулан сурагчдад өдөр тутмын гүйлгээн дэх мөнгөний үнэ цэн, ач холбогдлын талаарх үндсэн ойлголтыг бий болгоно;
• Хувь хүний санхүү: Хувь хүний санхүүгийн суурь ойлголттой болж, төлөвших нас нь хүүхэд наснаас эхэлдэг тул энэ үед санхүүгийн суурь ойлголтуудын талаар үнэн бодитой, зөв мэдээлэл өгөх; Сурагчид практик үйл ажиллагаа, дүрд тоглох зэрэг дасгалуудаар зорилгоо тодорхойлж, ахиц дэвшил гаргаж, сахилга баттай хуримтлалын дадал зуршлаар амжилтанд хүрэхийн талаар ойлголттой болно;
• Математикийн хичээлтэй холбогдох: Математикийн хичээлтэй холбон тооцоолол хийх бодлого бодох зэрэг олон дасгал хийж гүйцэтгэх юм. Мөн уг хөтөлбөрийн хүрээнд өгүүлбэртэй бодлого бодох, түүн дээр тооцоолол хийнэ.